منجزات الصين كثيرة جدا، وطلع منها عجايب، اخترعت الصحافة الحجرية والبارود وسور الصين العجيب اللي يعتبر أعظم إنجازاتها التاريخية، أما ثاني أعظم إنجازاتها فكان أسطولها البحري اللي أسسه وقاده الأميرال (زنج هي).
هذا الأسطول بنوه سنة 1403م بعد سنة وحدة من تولي الامبراطور (زو داي) السلطة، هذا الامبراطور كان مختلف عن كل الحكام اللي سبقوه، لأنه قاد نهضة عمرانية كبرى فهو اللي زاد من طول سور الصين ونقل العاصمة إلى بكين وشجع البحث العلمي وروح الابتكار وأسس منظمة لجمع المعلومات وكان مصمم على أن تقوم الإمبراطورية الصينية على الاختراعات والاكتشافات.. بمن أشبهه لكم .. بمن؟… تگدرون تگولون يشبه النظام الحاكم للعراق بعد السقوط 2003، الله وكيلكم نفس التوجهات والأهداف بس شويه بالعراق أسرع.
المهم إنجازاته كثيرة لكن أهمها كان الأسطول، ويكفي تعرفون عن الأسطول أن أسطول المستكشف كريستوفر كولومبوس، وأسطول المستكشف فاسكو دا جاما، اثنينهم يمكن تحطهم بطابق واحد من طوابق سفينة وحدة من سفن الأسطول الصيني المهيأ لعبور المحيطات، “يعني يحطهم بجيب الخردة” هذا الأسطول كان عبارة عن 62 سفينة عملاقة طول الوحدة 400 قدم وعرضها 170 قدم وفيها 9 صواري وسطح السفينة الرئيسي مساحته 50 ألف قدم مربع، ترافق هذه السفن العملاقة مراكب سريعة طول الواحد منها 370 قدم وسفن تحمل المؤن طولها 280 قدم وسفن تحمل الجنود ومراكب خفيفة للمواجهات البحرية.
باختصار هذا الأسطول سافر سبع مرات، كل مرة كان يتحرك بأكثر من 300 مركب و 30 ألف جندي وبحار ومئات المسؤولين و180 طبيب وعشرات المهنيين النجارين والحدادين والطباخين والخياطين وجيش من المترجمين اللي يتقنون كل لغات العالم، كل هذا وهو أسطول تجاري يجمع بين التجارة والاستكشاف والدبلوماسية، وبكل مرة سافر بيها كان يحمل مليون طن من الحرير الخالص الصيني والأواني الخزفية والعملات النحاسية ويرجع بالتوابل والأخشاب العطرة والأحجار الكريمة والحيوانات النادرة، وكذلك كل ما ينتج عن التبادل الثقافي مع العالم.
خلوا بالكم أن كل هذا كان قبل أن يخترع البرتغال سفنهم اللي غيرت التاريخ بمئة سنة ويبدأ عصر الكشوفات، واللي كان مستواها أقل من مستوى سفن الصين بكثير ولا تقارن بها، لكن خطأ واحد تسبب بضياع هذا الأسطول.
مات الامبراطور زو داي سنة 1424 وسيطر المحافظين (تاج الراس.. الخطوط الحمر.. الخ) على الحكم ونصبوا امبراطور جديد، گال: شنو هذا الأسطول طالع يفرفر بالعالم؟ ماكو داعي للرحلات الاستكشافية هذي..
سيدنا مو هذي بيها خير للصين وخوش فلوس ومصلحة الوطن بيها. گال:: لا .. لا .. تركوها؟
مولانا الامبراطور القديم گبل ما يموت صدر أمره أن يبحر الأسطول إلى العالم الجديد (أمريكا) گال: لا احنا شكو.. وطلعت اسبانيا واستفادت من العالم الجديد.
بعدين طلعت القصة كلها أن الامبراطور الجديد شغلته يخرب كل الإنجازات والجهود اللي سبقتها وبيها مصلحة للبلد كله حتى لا يگولون صارت بعهد فلان، ومن يومها وهو يهدم نصب ونافورة كبيرة ويسوي نافورة السطلة العجيبة، يحرگ الزرع ويستورد أحسن منه… يهد الماي بالخليج وما يسوي سدود ويستورد كهرباء “ساخت ارجنتين” وأعشاب طبية مفيدة، بدل المشروبات الكحولية.
د. فراس محمد