د. فراس محمد
سألوا الشاعر الشعبي الملا عبود الكرخي.. گالوا له: ملا.. ذكرت بقصائدك وبكتاباتك بالجريدة أكثر من مرة، المثل اللي يگول: ((زنده بله.. مرده بلا)) شنو سالفة هذا المثل؟
گال لهم: واحد من الأغنياء كان عنده خادم ذكي، بس كان مو خوش آدمي ويسئ لعمه اللي يشتغل عنده دايما، وبيوم حضرته الوفاة، جا الغني وگال له: گول ابني عندك وصية.. طلب؟
الخادم گال له: عمي آني أذيتك هوايه، وعندي وصية وحدة.. گال له: گول.. حاضر.. گال له: أريد من أموت تجيب حبل ثخين وتشده برگبتي وتسحبني بحديقة البيت بلكي الله يغفر لي اللي سويته وياك.. گال له: ابني ما يصير! گال: عمي هذي وصيتي ما عندي غيرها.
مات الخادم ونفذ الغني وصيته وشد حبل برگبته وسحب الجثة بحديقة البيت، وبهذي الأثناء مروا العسس (الشرطة) من گدام بيت الغني وشافوه يسحب جثة الخادم، اعتقلوه وقدموه للقاضي بتهمة قتل الخادم، والقاضي حكم عليه بالإعدام، فلما سمع قرار القاضي گال بالفارسية: ((زنده بله.. مرده بلا))، يعني بالعربي ((حي مؤذي.. ميت مؤذي)) ومن يومها صارت مثل.
أيباه.. هسه من أفكر بوضعنا والشكولات اللي شفناها بحياتنا، كم واحد يطلع لي “زنده بله.. مرده بله”!
د. فراس محمد