أريد رجال اللي يتقدم!

الوجيه البغدادي المرحوم حجي عبد الله الزيبق كان بيتهم بمحلة الشيخ بشار بالكرخ، قريب من بين الأسطة عبد الله الخياط الظريف البغدادي المعروف، بيوم حجي عبد الله الزيبگ راح لعلاوي الشورجة واشترى وزنة (100 كيلو) تمن عنبر من النوع الفاخر، الحمال شال التمن وحجي عبد الله گال له: ابني تندل محلة الشيخ بشار؟ گال له: إي عمي شلون ما أندلها! گال له زين روح هناك ومن توصل اسأل على بيت حجي عبد الله وانطيهم وزنة التمن، مشى الحمال وحجي عبد الله راح لشغله، لما وصل الحمال لمحلة الشيخ بشار شاف بگال بالسوگ وسأله عن العنوان بس الحمال شويه تخربط وبدل ما يگول وين بيت حجي عبد الله، گال وين بيت أسطة عبد الله، فالبگال گال له هذا بيتهم، الحمال دگ الباب ونزل گونية التمن بالبيت ومشى، الظهر رجع الأسطة عبد الله الخياط لبيته وشاف مرته فرحانة، وگالت له: أبو نجم عاشت إيدك على هالتمن العنبر.. خوش تمن.. احنا أساسا مخلصين تمن! الأسطة عبد الله انتبه أكو شي غلط بس هو سريع البديهة فعلى طول گال لها وهو يتفاخر: هاي شنو! آني رجال البيت.. شلون ما أجيبلكم.. أكلوا ألف عافية..

بنفس الوقت حجي عبد الله الزيبگ رجع لبيتهم وأول ما دخل سأل أهل بيته: ها يابه شلون شفتوا التمن؟ گالوا له ياتمن؟ گال هذا اللي دزيته اليوم بيد الحمال! گالوا له: ماكو هيچ حچي.. گال شنو ماكو آني الصبح اشتريت وزنة تمن ودزيتها بيد الحمال.. المهم طلع حجي عبد الله من البيت وأول شي سأل البگال القريب گال له ماكو حمال سألك على بيتي اليوم؟ گال له إي أكو حمال سأل على بيت الأسطة عبد الله الخياط ونزل الگونية ببيتهم.. الحجي عبد الله راح لبيت الأسطة الخياط ودگ الباب.. أسطة عبد الله ما فتح له الباب وطلع راسه من الشباك وگال له: شكو چلبي خير؟ گال له يابه أسطة.. اليوم الحمال غلط وجاب گونية التمن مالتي لبيتكم.. الأسطة عبد الله گال له: ماكو هيچ حچي.. يمعود عدل بدل؟ دا أگول لك ماكو هيچ حچي.. انت ليش تلح؟ يا معود أبو نجم مو انت مسلم.. اليوم دنيا وباچر آخرة شلون تاكل حرام؟! گال له شوف چلبي .. تريد الصدگ؟ الگونية وصلت وطبخنا منها أول طبخة.. فعليه الحساب بيني وبينك راح يبقى ليوم القيامة إذا الله دخلني الجنة راح انطيك بمكانها گونية لولو .. وإذا الله دخلني للنار أريد رجال اللي يتقدم! فضحك الچلبي (حجي عبد الله الزيبگ) وترك له وزنة التمن عن طيب خاطر.. لإنه يعرف أن عبد الله الخياط كان فقير معدم..

هسه احنا صار لنا 15 حمالنا يأخذ التمن مالتنا ويوديه لبيت الأسطة عبد الله الخياط إلى أن صار هو “چلبي” واحنا فقراء معدمين.. والوعد يوم القيامة!