شفافية أيام زمان

بسنة 1926 أمانة بغداد كانت تشتغل بتبليط الشوارع، وكانت راصدة بميزانيتها مبلغ لهذا الموضوع والصحفيين راحوا لأمين العاصمة يسألوه عن المبلغ، فصرح لهم هذا التصريح اللي نشرته الجرايد:

المبلغ اللي رصدته الأمانة بميزانيتها هو لُكين روبية (اللُك هو مليون وإذا تسلم على بغدادي قديم گبل أكثر من ثلاثين سنة وتگول له مرحبا يگول لك: لُك الهلا يعني مليون هلا، المهم الأمانة راصدة مليونين روبية) والمبلغ المرصود للعملية ما خلص بعده والعمل مستمر بكل نشاط ضمن هذا المبلغ، وتتوقع الأمانة أنها تبلط بهذين اللُكين القسم الواقع بين باب المعظم وشار الجسر القديم (جسر الشهداء) بل تتعداه وليكن معلوما أن اللُكين روبية دفعنا منها فلوس الآلات والأدوات الميكانيكية اللي نحتاجها بتبليط الشوارع وأن من ضمن المبلغ أيضا صرفيات مجاري المياه المكشوفة بالشوارع وتركيب أنابيب صرف مياه الأمطار والمياه القذرة، أما الأربع لكوك اللي قررت الأمانة أن تستلفها من الخزينة العامة فهذي تكفي لتبليط كل الشارع ولذلك ما تفكر الأمانة بأي طريق آخر للحصول على مبالغ أخرى.

بالمناسبة كلمة شفافية ما كانت مستخدمة بذاك الزمن وأنا استعرتها من فطاحل هذا الزمن، شنسوي لأهل ذاك الوكت ناس على گد حالهم وينهم ووين الشفافية وهالكلام الكبير على گولة سعيد صالح.