ميتنا أكبر وأهم من ميت المسيو

المسيو جورج كان واحد من أفضل الكتاب الهزليين ورسامي الكاريكاتير المحترفين بمجلة (لورير) الپاريسية، وكان يترصد السياسيين بانتقاداته اللاذعة، بس هو واحد “شقندحي” يبتكر المواقف، وكلماته بالعظم، يوم من الأيام راح لكاتدرائية نوتردام دو پاري بپاريس وسأل واحد من القساوسة گال له آني منتبه من يموت أحد يدگ ناقوس الكنيسة بس كل مرة دگة شكل، شنو يعني كل واحد له دگة خاصة؟ فالقسيس گال له طبعا تختلف من ميت لآخر.. گال له شلون يعني؟ گال له على عدد الدگات إذا دگ الناقوس مرة وحدة يعني الميت عادي من أصحاب الحضرات، فيحضر الجنازة القساوسة، إما إذا دگ الناقوس دگتين فيعني الميت من أصحاب السعادة فيحضر قداس الجنازة الخوارنة، وإذا دگ الناقوس أربع دگات هذا يعني أن الميت من أصحاب المعالي فيحضر قداس الجنازة المطارنة، ولا سمح الله إذا سمعت خمس دگات فهذا يعني رئيس الجمهورية مات..

المسيو جورج شكر القسيس على المعلومات وطلع من الكنيسة، لكنه رجع متخفي بنص الليل وگدر يصعد للناقوس ضربه ضربة وحدة فاجتمع القساوسة وبعدها بشويه ضرب الناقوس ضربتين فاجتمع الخوارنة، انتظر شويه وربة ثلاث ضربات، بعدها انتظر وضربه أربع ضربات فاجتمع المطارنة وبعدين خمسة ضربات حتى اجتمع بالكنيسة أكثر من 100 واحد من البطريرك إلى الشماس وسمع أصواتهم وهم محتارين، رجع وأخذ مطرقة الناقوس ودگ سبع وثمان دگات، فعرف القساوسة أن اللي يدگ الناقوس واحد مجنون تسلل للبرج وماكو أحد ميت ولا قداس جنازة فاستنجدوا بالشرطة اللي نزلته من البرج وأخذته للتحقيق.. ليش دگيت هذي الدگات بالترتيب؟ گال لهم لإن عندي جنازة ميت عظيم! گالوا له ميتكم من الحضرات؟ گال لهم أعظم! گالوا له من أصحاب السعادة؟ گال أعظم! زين من أصحاب المعالي؟ گال لا أعظم! المحقق گال له: قابل مات رئيس الجمهورية؟! گال له أعظم من رئيس الجمهورية! گال له هو منو بعد أعظم من رئيس الجمهورية؟ وگف المسيو جورج وگال له: انا ميتي الحق.. الحق هو اللي مات بهذا البلد!

خلص رمضان اللي كان مليان بالأحداث بالعراق طلعت نتائج الانتخابات.. خاب أمل اللي متوقعين أن الانتخابات فرصة لحياة أفضل لو تغير شي وتخلصهم من العصابات واللصوص.. نفس وجوه الخراب وزيادة.. طلعت الانتخابات مزورة.. حسبوها بيدكم… فجروا كدس العتاد.. حرگوا الصناديق.. النتيجة التحالف الأخير.. بالله بربكم ميتنا أعظم لو ميت المسيو جورج؟ هسه احنا لازم كم مرة ندگ الناقوس! زين إذا جا المسيو جورج وشافنا هم يدگ الناقوس؟! لو يمكن يختصرها ويصير بوذي!