حگتين عگارب

يگولون واحد من وجهاء بغداد قديما مات وترك ثروة وولد واحد، وهذا الولد بقى يصرف ويبذر إلى أن بدد الثروة كلها وما بقى شي منها، راد يتزوج وراح لعمه طلب بنته، العم يعرف ابن أخوه مفلس لكن شلون يرفض والعادات الاجتماعية بصالح ابن أخوه، فگال له: ابني عندك فلوس حتى تتزوج وتدفع مهر؟ گال له: لا والله عمي ما عندي.. گال مو عيب أزوج بنتي بدون مهر، شيگول الناس عني؟ گال والله ما أدري، بس آني ما عندي والسلام وأريد رجال اللي يتقدم ويخطبها، العم گال له: زين أقل شي جيب فد حگتين عگارب (8 كيلو)، گدام الناس حتى يعرفون أنت تعبت وجبت شي، گال له زين كم يوم تنطيني فرصة أجمعها؟ گال له أربعة وعشرين ساعة غيرها ماكو إذا ما جبتها انس الموضوع، العم طلب هذا الطلب حتى يدفع شره ويخلص منه وما يترك له حجة، ويدري منين الإنسان يجمع عقارب بهذا الوزن والوقت والعقارب ما تطلع إلا بالليل، لكن الولد قبل وطلع من البيت ما يعرف وين يروح، وبالطريق شافه واحد حشاش، گال له: ها شبيك صافن؟ گال والله السالفة هالشكل وآني ورطت نفسي، منين أحصل العگارب، الحشاش گال له بسيطة ولا تهتم هاي سهلة.. گال له شلون سهلة؟ گال له تعرف مختار ميت؟ گال له أعرف هوايه مختارين ماتوا.. گال له تندل قبر أحد منهم؟ گال له طبعا، گال له امشي آني وياك ننبش قبر مختار وبيك خير واجمع عگارب – على اعتبار أن المختار كان أسوأ إنسان ويبيع ضميره على مكاسبه الشخصية – المهم راحوا لمقبرة الشيخ جنيد بالكرخ وحفروا بقبر مختار وطلعت عليهم العگارب بالآلاف، وجمع منها المطلوب وراح لعمه وانتهت السالفة… مشكلة الولد وعمه صحيح قديمة بس هذي تتكرر والشباب لازم ياخذون احتياطاتهم.. يعني مو كل مرة تحصل لك واحد محشش وعنده فكرة، وبعد ما انتهوا المختارية لازم الواحد يعرف منو أسوأ صنف بالمجتمع اللي يبيعون ضمائرهم على مكاسبهم الشخصية، ويندل گبورهم.