د. فراس محمد
أشقودره وحدة من مدن ألبانيا، هذي المدينة مشهورة بالأمطار الغزيرة، قبل 100 سنة أو أكثر زارها تاجر من تجار إسطنبول لغرض التجارة، وصل التاجر للمدينة وهي تمطر، نزل بالفندق على أمل يخلص المطر وينزل يقضي شغلاته التجارية، يوم يومين، أسبوع أسبوعين، شهر والمطر مستمر وخلص أيام من الشهر الثاني والمطر ما تغير وضعه، فترك المدينة ورجع لاسطنبول وما گدر يسوي شغله، مرت عشر سنين وبيوم كان التاجر گاعد بالگهوة باسطنبول، وإذا برجل غريب يدخل الگهوة ويگعد بجنب التاجر، وصار بينهم التعارف البسيط:
ـ التاجر: صبحكم الله بالخير.
ـ الغريب: صبحكم الله بالخير والكرامة.
ـ التاجر: منين شرفتوا؟
ـ الغريب: من اشقودره.
ـ التاجر: أهاااا.. گلي بعدها تمطر يمكم لو بطلت؟!
صحيح تذكرت شغلة… الجماعة اللي بالعراق، مساكم الله بالخير أو صبحكم.. هم بعدهم يفرزون نتائج الانتخابات يمكم؟ وبعدهم يحاولون يشكلون حكومة؟!
د. فراس محمد