د. فراس محمد
أكو واحد لزموه بجامع من جوامع بغداد وهو شايل زولية، طبعا السالفة مبينة حرامي وبايگ، ولمركز الشرطة ومنه للمحكمة بتهمة السرقة، الحاكم صار عصبي عليه، گال له: ولك انت شلون تبوگ الزولية من بيت الله! ما خليت حرمة لرب العالمين؟! المتهم گال له: عمي الله يحفظك آني مو حرامي حتى تگول لي بايگ.. آني رجال تقي، روح اسأل كل العالم عني، بزماني أطعمت كم فقير؟ وكسيت كم عريان؟ شنو هذا ما له حساب عند رب العالمين؟ انت مو حاكم.. ما قاري الآية الكريمة اللي تگول: ((من ذا الذي يقرض الله قرضا حسنا فيضاعفه له أضعافا كثيرة))؟ الحاگم گال له طبعا قاريها.. المتهم گال له بس خلصنا آني هسه هلكت وجيت استوفي ديني وأخذت هذي الزولية بحسب الميانة!
هسه يا الله عرفت ليش “الاتقياء” نفضوا العراق تنفض وما تركوا ولا زولية وخلوه قاعا صفصفا، احنا عبالنا بوگ طلعت السالفة شلع دين بحسب الميانة، ثاري الاتقياء عندهم مفهوم مختلف للقرآن.. شوف شلون ظلمناهم!
د. فراس محمد