يُـبَـه ماني حمد

جلعوط الشلاتي شاف بدوي ببغداد مبين عليه توه واصل، راح سلم عليه بلهفة وأحضان وبوسات ويـا هلا بحمد… چثير الهـلا بحمد .. شلونك يـا حمد ..شلون العيـال .. شلون الغنم.. بعد شلونك.. يا مية هلا بحمد، والبدوي مذعور ومتفاجئ، رجع للورا وگال له: يُـبَـه ماني حمد.. انت متوهم. جلعوط گال له: هاي شنو؟.. دتقشمرني! ليش آني ما أعرفك.. يا ما نزلنا عندكم بالعرب.. يا ما ضفناكم وأكلنا من خبزكم.. والله اليوم ما تتعدى خطوة إلا تتغدى ويايه.. دمشي .. امشي .. أبد ما يصير. وبهذي الطريقة جلعوط الشلاتي سحب البدوي المسكين لمطعم الكباب وأكلوا حتى شبعوا.. راح البدوي يغسل يده منا، وجلعوط طلع منا وگال للكببچي: الحساب عند الشيخ، البدوي طلع لزمه الكببچي، ادفع، گال شدفع تره انا ضيف، الكببچي گال له ادفع آني شبعان من هالسوالف.. البدوي تعوذ من الشيطان ودفع الحساب وهو يگول: وين چانت لي هالطرشة! أگول له يُـبَـه ماني حمد.. يگول لي لا انت متوهم.. انت حمد.
عاد تدرون حساب الكببچي يعتبر مثل القروض السيادية يعني حمد حتى لو ما شايل فلوس يدفعه فلوس الكباب وإذا مات أولاده وأولاد أولاده يدفعوه، والله شلون ما أحسبها حمد سالفته أحسن من سالفتنا.. إي على الأقل جلعوط الشلاتي شبعه كباب، يعني الشلاتي اللي تورط به من النوع اللي ياكل ويوكل، شو احنا الشلاتي اللي وگع براسنا ياكل وحده… يا الله ما علينا بس ما وصيكم مو تنسون تره الشلاتي توه طالع من مطعم الكويت – عفوا توه ماكل كباب بالكويت – حضروا فلوس الكباب.
ها تذكرت .. مو تنسون تره بشهر الخامس راح تشوفون نفس الشلاتي وهم راح يگول لكم: هلا بحمد… چثير الهـلا بحمد .. شلونك يـا حمد ..شلون العيـال .. شلون الغنم.. بعد شلونك.. يا مية هلا بحمد، عود هم روحوا للمطعم وياه.