لا تغرك هالعمايم!

بيوم 22/3/1930 كان الملا عبود الكرخي – الشاعر المعروف – گاعد بمحل محمد يونس بمدينة العمارة وكان قريب من المحل گهوة بيها گرامافون -جهاز مال أسطوانات مثل المسجل – فجاء مدرس بالجامع الكبير وگال لمحمد يونس بلكي تگول لصاحب الگهوة إذا مر من هنا الشيخ شاكر – وهو رجل دين معمم – يگطع اسطوانات الأغاني ويحط اسطوانة مال تلاوة القرآن الكريم وإلا تره أروح اشتكي عليه يم المتصرف – المحافظ – فمحمد يونس گال له يصير خير وراح بلغ صاحب الگهوة، ولما فات الشيخ شاكر بالسوگ ولمحه صاحب الگهوة راح غير الاسطوانة وبدل القرآن حط أسطوانة لمغني يگول بأغنيته :
خلي حمزة الطبر نايم لا تذبه بالتهايم
لا تغرك هالعمايم أكثر الرگي فطير
ووراها گام كل ما يفوت الشيخ شاكر من گدام الگهوة يحط له هذي الأغنية.
الغلط لما الناس تقدس رجال الدين مو الدين نفسه، أما بالنسبة لنا فالحمد لله تركنا الگهوة اللي كانت ملكنا أصلا وگعد بيها أبو عمامة بدلنا وهسه كل ما نفوت من گدام الگهوة يحطلنا أسطوانة القرآن الكريم والحمد لله كلش مرتاحين منه!