د. فراس محمد
هذا ببداية تشكيل الحكومة العراقية بعد الاحتلال الانگليزي واحد من القايمقامية گال لرئيس البلدية اكتب إعلان على باب غرفتك حتى تمنع دخول الضيوف والجلوس بالغرفة باستثناء أعضاء المجلس البلدي.. رئيس البلدية ما كذب خبر راح وكتب هذا الإعلان ولزگة على الباب: ((يأمر سعادة القايمقام وأمره على العين والراس بأنه ممنوع خشوش الخطار وشرب الگهوة والجگاير.. بلاكت أعضاء البلدية إذا خشوا على العين والراس .. ماكو باس)).
ثاني يوم مر للبلدية مراجع شقندحي ملعّب.. قرأ الإعلان المضحك، فطلع قلمه وضاف هذي العبارة بآخر الإعلان: ((گام الداس يا عباس)).
احنا شبعنا بزماننا من هذي الأفلام على الكتب الرسمية خصوصا لما يحب “المسعوول” يهمش على كتاب رسمي والمصيبة يطلع مدير عام لو رئيس مجلس محافظة لو محافظ “نص ردن” صدگ ذاك الشقندحي من گال “گام الداس يا عباس”