د. فراس محمد
مركبات بغداد الفاخرة
في سنة 1914 بغداد ما بيها سيارات ومركباتها كانت عرباين، لكن هذي درجات يعني اللي سيارته مرسيدس مو مثل اللي سيارته سايبا، وإذا حسبناها هالشكل فالمركبات الفاخرة هي بس العرباين اللي تجرها الخيل الأصيلة وهذه كانت 6 عربان فقط تجرها خيول عربية أصيلة بالإضافة إلى عرباين القناصل الموجودين ببغداد.
الأولى: عربانة الوالي العثماني، وهذا هو موكب الوالي عربانة وحدة بس، (تعادل المرسيدس اليوم)
الثانية: عربانة السيد عبد الرحمن النقيب الگيلاني، نقيب أشراف بغداد، ويجرها حصان واحد، وهذي تعادل المرسيدس.
الثالثة: عربانة السيد داود بن السيد عبد الرحمن النقيب، وهذي أفخم وأرقى مركبة ببغداد يعني شلون تگولون اليوم لامبرگيني لأنها مصنوعة بطريقة ماهرة ومرصعة بمسامير فضية ونحاسية وعليها فوانيس وسيورة جلد ويجرها حصانين من الأصايل (أبناء المسؤولين مدللين دايما).
الرابعة: عربانة العلامة عبد الوهاب النائب.
الخامسة: عربانة ابن آل جميل زادة.
السادسة: عربانة نصرت باشا مفتش الجيش التركي.
وهذي هي أفخم مركبات بغداد، أما القناصل الأجانب فكل واحد منهم كان عنده عربانة وحدة يجرها حصان واحد لكنها أقل مستوى من العرباين الستة لإن بيها تايرين بس وماكو مكان للسايق، القنصل هو يسوقها وتگعد زوجته بصفة يطلعون العصريات لباب الشرجي للنزهة ويرجعون.
أما باقي الناس فعندهم عرباين بسيطة تجرها البغال والحمير والخيل الكدش.