يابه.. انت واگع من السطح؟!

المرحوم عبد الله الخياط – واحد من ظرفاء بغداد المعروفين – وگع من سطح بيتهم للحوش وانكسرت رجله ونام بالفراش كم يوم، ومن أول يوم گال لزوجته لا تدخلين علي أي أحد من أصدقائي أو أهل المحلة من اللي يريدون يزوروني، إلا بعد ما تتأكدين أن اللي يزورني سبق وأن وگع من السطح،
ـ ليش يا رجال شنو السبب؟
ـ انتي معليچ
وشاع خبر وگعة الأسطة عبد الله وكسر رجله وبدأ الناس يزوروه… 
ـ طق طق طق
ـ منو؟
ـ سوي درب نريد نشوف الأسطة عبد الله ونسلم عليه..
ـ يابه انت واگع گبل من السطح؟
ـ لا .. خير!
ـ روح عيني الله وياك الأسطة نايم ما أگدر أگعده..
وهكذا كلما دگ الباب واحد سألته هذا السؤال، إلى أن جا حبزبز صديق الأسطة من محلة قنبر علي ودگ الباب..
ـ طق طق طق..
ـ منو؟
ـ آني حبزبز.. الأسطة گاعد.. أريد أشوفه؟
ـ يابه انت واگع گبل من السطح؟
ـ أي أختي…
ـ تفضل أخويه
دخل حبزبز وسلم على عبد الله الخياط وسأله عن صحته، وگال له: ما عندك إلا العافية أبو نجم، وطلع، زوجة الأسطة احتارت وسألت زوجها، أبو نجم ليش سمحت لحبزبز يدخل والباقين ما استقبلتهم؟ گال لها شوفي، لو يجيني واحد ما جرى عليه اللي جرى عليه راح يتعبني بأسئلته التافهة:
ـ گلي منين وگعت؟
ـ من السطح..
ـ أدري ماكو محجر بالسطح؟
ـ لا والله ما حطينا..
ـ هاي بيش ساعة صارت؟
ـ والله ما أدري فزيت من النوم وگمت أشرب ماي ووگعت..
ـ شنو انت أعمى ما تشوف؟
ـ يابه شنو السالفة قضاء وقدر..
ـ لعد ليش ما درت بالك.. السطح شكبره شعرضه؟
ـ يابه الـ (لو) زرعوها وما خضرت..
ـ فكنا أغاتي أنت تمشي بلا وعي..
ـ شسوي الحمد الله..
ـ زين ما چان أكو أحد وياك بالسطح؟
ـ نعم .. الولد وأمهم نايمين فوگ ..
ـ لعد ليش ما لزموك؟
ـ هسه وتالي وياك؟…
لكن اللي يزورني وهو مر بنفس الحالة ما يسأل هذي الأسئلة التافهة، يسلم ويمشي مثل حبزبز.
هسه احنا واگعين من السطح ومتنعنعين تنعنع وما بقى شي بينا ما تكسر.. وعلى طاري الانتخابات ومرشحيها، بالله هذا اللي يوزع برتقال للناس لو بتيتة لو ذاك اللي يوزع خيار لو اللي يسوي لفات گص ويوزع، بمشهد رخيص كله ابتذال وحقارة، والصورة الأسوأ هي صورة الناس اللي يتجمعون وياخذون منهم.. بالله اللي يسوي هالشكل هذا واگع من السطح مثلنا؟ الحقيقة هذا هو اللي دفعنا من السطح لإن أحنا ما وگعنا من كيفنا مثل الأسطة عبد الله الخياط.. اللي يفكر يرشح نفسه للانتخابات أول شي لازم ما يكون بقوائم اللي دفعونا ووگعونا من السطح وهي كل القوائم اللي شاركت من قبل بالانتخابات دون استثناء حتى بعد ما تلونت وغيرت أسمائها، ولازم يكون شخص واگع من السطح من قبل، وجرى عليه اللي جرى علينا وإلا راح يضيع عمرنا ما بين هذا وذاك وسوالفهم.
الأسطة عبد الله الخياط رجال أمي لا يقرا ولا يكتب والحادث اللي صار له كان قبل أكثر من 100 سنة ومع ذلك عرف السالفة وما قبل يستقبل أي واحد يضيع وقته ويزعجه، والله خزي بعد كل هالسنين ينضحك على العراقيين مرة بعد مرة؟