رئيس كل شي أصير إلا هذي

تتذكرون حبزبز من محلة قنبر علي صديق الظريف البغدادي عبد الله الخياط، حبزبز هذا دخل وحدة من الماي خانات (مطعم ومشرب) فشرب حتى سكر، وطلع يعربد بالشارع، أخذته الدورية ورمته بسجن حجي أحمد آغا المشهور – حجي أحمد آغا كان منصبه (داروغا) بغداد يعني رئيس العسس “مدير الشرطة الليلية” وشخصيته كانت قوية وصار أشبه بالحاكم العسكري وبدأ يطبق القانون على مزاجه لإن المسؤولين كانوا مشغولين بالتمتع بحياتهم، ولذلك اشتهر صيته بكل الدولة العثمانية وانتبه له والي بغداد سليمان ناصيف ورقاه إلى منصب المهر دار سنة 1915 يعني حامل الأختام ومساعد والي البصرة وصار الرجل الثاني ببغداد – المهم ثاني يوم الصبح وصل أحمد آغا للدائرة وأمر بالفلقة وعصي السفرجل والرمان والموقوفين اللي بينهم حبزبز.. قدموا له أول واحد فسأله: ولك انت شنو؟ الموقوف گال مولاي آني عسكر.. الآغا گال بس آني هم سر عسكر.. طرحوه وشبعوه ضرب، بعدين سأل الثاني: ولك انت شنو؟ گال مولاي آني محاسب بالمالية.. گال الآغا: آني هم مدير المالية.. اطرحوه وشبعوه ضرب.. بعدين سأل الثالث: ولك وانت شنو؟ گال مولاي آني تاجر، گال الآغا: آني هم شيخ التجار.. اطرحوه وشبعوه ضرب… وحبزبز واگف ينتظر دوره ويشوف الضرب گدامه وشلون يتألمون وكل واحد منهم يگول مهنته أحمد آغا يدعي إنه رئيس المهنة، إلى أن جا دور حبزبز وگال له أحمد آغا ولك وانت شنو: گال مولاي خادمكم نزاح بسوگ الغزل.. فأحمد آغا گال له: اطلع بره أدبسز آني كل شي أصير بس رئيس نزاحين ما أصير، وبهذي النكتة خلص حبزبز من الفلقة.
تعال هسه خلص العراقيين من الفلقات اللي ياكلوها.. حتى سالفة حبزبز ما نگدر نطبقها، هذوله شتگول لهم يطلعون رؤساء المهنة.. تگول له احنا العراقيين متدينين ونخاف الله يگول لك احنا شيوخ وسادة.. تگول له تعبنا سنين طويلة شبعنا قهر يگول لك احنا مسجونين سياسيين وخدمة جهادية وشهداء.. تفكر بالفساد تحصله گدامك شو مراكز المساج ودور الدعارة هم سادتها وملاكها.. هاي شلون سالفة عويصة!