د. فراس محمد
اجتمع الشاعر جميل صدقي الزهاوي الله يرحمه هو وواحد من أشهر الكذابين ببغداد بأحد المجالس، وصادف أن الكذاب گاعد يسولف للحضور قصة واحد ساحر هو حضرها بنفسه – حسب ادعائه – يگول شفت الساحر جايب جدر وشعل النار تحته وبعد شويه فار الجدر وإذا براس إنسان يطلع من الجدر ويسلم على الجماعة الواگفين بلسان عربي فصيح! وكان مكتوب على جبين الراس سطر واحد.. بعدين التفت للمرحوم الزهاوي وگال له: أستاذنا، تعرف إيش كان مكتوب بهذا السطر؟ فالزهاوي فورا گال له: كان مكتوب ألا لعنة الله على الكاذبين.. فضحك الحضور وصاحبنا الكذاب خجل من جواب الزهاوي وسكت.
لما المجتمع يگول للكذاب أنت كذاب بوجهه وما يسمح له يضحك عليه تصلح الأحوال ويقل النفاق وتتطور المجتمعات والدول.. أما إذا سكتوا على الكذاب وگعدوا يسمعوه فأكيد مرة على مرة يصير رمز من رموز المجتمع والسياسة والأمة، وبالنهاية المغفل المستمع مو الكذاب.. وهذا اللي وصلنا له.