فلتانة دائرة سي

الملا شجر كان يشتغل قاضي بوحدة من المدن العراقية بعهد السلطان عبد الحميد، وهو العهد اللي انتشرت به الرشوة وبسببها عزلوا القاضي الملا شجر وعينوا واحد بمكانه، الملا شد الرحال لاسطنبول يطرق أبواب المسؤولين ويقدم الهدايا، بس ما حصل نتيجة… وأخيرا طرق باب قصر أبو الهدى وهو واحد من أهم الشخصيات وبدأ يتوسل و”يتمرغل” على أعتاب أبوابه، والشيخ أبو الهدى.. بسيطة والله كريم ويصير خير وماكو نتيجة إلى أن نفض الملا آخر ليرة بجيبة گال للشيخ: هسه تاليها شنو .. مو هلكت .. وآني ابن ولايتك؟!
أبو الهدى گال له: ما تروح وتچفيني شرك.. شگدر أسوي لك إذا الحكومة فلتانة
الملا شجر گال له: فلتانة يعني كلمن إله؟ گال أي لعد شعبالك انت
المهم الملا شجر رجع لديرته وجمع ربعه الحبربشية المفلسين وگال لهم: ولكم تعالوا آني أسست دائرة باسم (فلتانة دائرة سي) وعينتكم جباة، وظيفة هذي الدائرة انها تأخذ رسم معين على كل جنازة تدفن والرسم حسب ثروة الميت وإمكانيته .. وطبع لهم وصولات يسلموها لاهل الميت بعد ما ياخذون منهم الرسم، وشويه شويه كبرت الدائرة وكثر الموظفين.. وبيوم من الأيام ماتت زوجة أبو الهدى، وجاء الجابي على أبو الهدى وگص له وصل وگال له ادفع الرسوم، أبو الهدى تعجب وگال له ولك رسم مال شنو؟ گال له الرسم مال الدائرة غير.. هاي يا دائرة؟ دائرة فلتانة سي.. أبو الهدى تعجب لإن عمره ما سامع باسم الدائرة وبدا يحقق إلى أن عرف أن الدائرة الوهمية تابعة للملا شجر، فدز عليه، وگال له ولك شنو هاي؟ انت شلون تأسس دائرة وهمية بدون علم الحكومة؟ الملا شجر گال له مولانا بس احنا منين نعيش؟ جنابك مو گلت لي الحكومة فلتانة! أبو الهدى گال له: وانت شنو؟ الملا گال له آني هم رئيس دائرة الفلتانة.
الحمد لله احنا أمورنا تختلف .. هاي شلون چانوا عايشين!