الوالي التقي

يوم 12 كانون الثاني 1890 وصل سري باشا إلى بغداد حتى يستلم مهام عمله بصفته والي بغداد الجديد، هذا الوالي يختلف عن كل الولاة العثمانيين اللي سبقوه وحتى اللي صاروا بعده، لأنه الوحيد بينهم اللي كان يشتغل بالأدب وعلوم الدين، وعنده مؤلفات مختلفة بالعلوم الإسلامية، يعني تگدرون تگولون رجال صاحب دين يخاف الله، وأول ما استلم منصبه بدأ يكرم رجال الدين ويعزهم، وأول خطبة خطبها بالناس بمناسبة تنصيبه تكلم بيها عن الحق والتراجع عن الخطأ.
ما أطولها عليكم سري باشا بقى بمنصب الوالي سنة وسبعة أشهر، هذي المدة صار بيها جرائم ما صارت بعهد أي والي غيره 200 جريمة قتل ببغداد خلال 8 أشهر والرشوة انتشرت بداية من الوالي إلى أصغر جندرمة ببغداد، الناس يعرفون القتلة بأسمائهم لإن ارتكبوا جرائمهم بالنهار وگدام الناس ومع ذلك يلقون القبض عليهم ويطلعون بنفس اليوم لعدم وجود الشهود، لإن القضاة صاروا يبيعون أحكام تخليص المجرمين للمجرمين نفسهم، يعني مجلس القضاء الأعلى مال ذاك الزمان فاتحها شركة خاصة ومسويها دكان مال صكوك البراءة، والتسيب ببغداد واصل لابو موزة، ولو لا أن القنصل الفرنسي المسيو بونيون في بغداد كتب هذا الكلام برسالة لحكومته يوصف بيها الحال في بغداد، ويگول لهم أن هذا الشخص المرتشي يبيع كلشي مقابل المال، كان ما عرفنا تفاصيل هذي الفترة اللطيفة اللي شاعت بيها الرشوة والتفسخ واللصوصية… يالله كله يهون.. المهم سري باشا صالح وتقي وورع واهتم بالعلماء والشعراء اللي كانوا بمثابة القنوات الفضائية والانترنت أيامها، والباقي يهون