مشكلة جديدة للبغداديين

الطائرات الإنگليزية سببت للبغداديين الخوف والذعر ليلة سقوط بغداد سنة 1917 لأنها ألقت عليهم قنابلها، وبعد احتلال بغداد تعود الناس على الطيارات وصارت مألوفة عندهم، وصاروا ما يخافون منها ولا يستغربون، لكن طلعت لهم مشكلة جديدة بسبب الطيارات لما بدأت تطير بارتفاع منخفض قريب من سطوح البيوت، ومثلما تعرفون بيوت بغداد على الطراز الشرقي يعني بيها حوش مفتوح بدون سگف، والناس معلوماتهم بسيطة خصوصا بالتكنولوجيا والآلات الحديثة، وطلعت إشاعة تگول: الطيارين الإنگليز يطيرون بارتفاع منخفض حتى يشوفون النسوان بالبيوت من خلال الناظور اللي بالطيارة، وهذا يعني انتهاك حرماتهم، فكان الموضوع مشكلة بالنسبة لهم، حتى يقال أن السيد عبد الرحمن النقيب (نقيب أشراف بغداد) أمر نساء بيته ما يتحركون داخل البيت إلا وهن لابسات العباية.
مع أن الإشاعة ساذجة جدا وما يصدگها إلا البسطاء أو اللي ما عندهم فكرة عن سرعة الطيارة ومدى الرؤية من الأعلى وشلون تكون لما يمر بسرعة فوق البيوت، لكن الحدث كله يعرفنا شلون كانت الغيرة عند البغداديين.