انت هص.. وآني هص.. وكل شي بالنص

فد يوم حرامي (اندار) على بيت من بيوت بغداد، وبدا يجمع اللي يشوفه من أغراض البيت الخفيفة والغالية، شويه وسمع صوت خافت بالبيت طفى شمعته وگعد على الگاع وتخفى بالظلمة وهو خايف، بعد شويه شاف شبح إنسان يمشي مشية الحرامي، فسحب خنجره ولزمه وهدده، لكن الرجال طلع ما يخاف وگال للحرامي: وخر خنجرك ليغاد أحسن لك، تره أصيح بصوت عالي وألم عليم الناس، الحرامي گال له: انت منو؟ الرجال گال له آني حرامي مثلك، الحرامي الأول رجع خنجره لحزامه، وگال للحرامي الثاني: زين لعد انت هص.. وآني هص.. وكل شي بالنص، فوافق الثاني وصارت الجملة مثل بغدادي من يومها. هذي البوگة صارت أيام الدولة العثمانية وأهل البيت نايمين ما حسوا على الحرامية، ولو واحد منهم گاعد مستحيل تكمل البوگة وچان إلتمت المحلة عليهم، بس الدنيا تغيرت وتطورت، والحرامية تغيروا وأهل البيت تغيروا بعد… انتوا ليش تروحون بعيد.. أعرف ناس كل أربع سنين همه بنفسهم يروحون لسوگ الحرامية ويدخلون لبيتهم 328 حرامي، والحرامية كل واحد منهم يدخل وياه أربعين خمسين حرامي ويمكن أكثر، ويلعبون بالبيت وأهله “شاطي باطي” وأهل البيت گاعدين مو نايمين وممشيها عادي…لا وحتى الحرامية بعد تغيروا لإن گبل واحد يگول للثاني انت هص وآني هص.. وكل شي بالنص..شو هسه من أول يوم تفاضحون عادي ولا يهمهم، ويتقاسمون ماكو مشكلة. يا جماعة آني أشوف لازم نسوي مراجعة للأمثال البغدادية ونغيرها، لإن هذي ما گاعد تنطبق على واقعنا، نريد أمثال بيها حكمة تتوافق ويه الواقع!