د. فراس محمد
الفريق حسين ناظم باشا كان والي بغداد سنة 1908 وجاء بعده أربع ولاة ورجع والي بغداد مرة ثانية خلال السنوات 1910-1911، هذا الرجل ترك بصمته على العراق وبغداد لأنه كان قائد إصلاحات الدولة العثمانية بالخطة العراقية آنذاك، بعدها في سنة 1912 صار رئيس أركان الجيش العثماني ويوم 23/1/1913 اغتالته جمعية الاتحاد والترقي خلال انقلابهم العسكري، أما أهم أعمال ناظم باشا كانت:
1ـ جدد أسلحة الجيش في بغداد وجدد ملابسهم ودفع رواتبهم المتأخرة وبنى لهم معسكر خارج المدينة، وقضى على ظاهرة الفرهود في بغداد اللي كانت تتكرر مع كل عيد، لإن الجنود العثمانيين كانوا يهجمون على المحلات ويفرهدوها قبل العيد بسبب تأخر رواتبهم.
2ـ حصل فتوى من علماء الدين بإعدام كل من يجاهر بالظلم ويستولي على أموال الناس بالباطل والسلب والنهب بحجة الغزو، فانتهت المعارك بين العشاير طول مدة ولايته.
3ـ بنى سدة تحمي بغداد من الفيضانات (سدة ناظم).
4ـ افتتح شارع المستنصر وكان الشارع الوحيد وبلطه بالگير.
5ـ جمع المجانين وأصحاب الأمراض المعدية وخصص لكل منهم بناية وعزلهم عن الناس وخصص راتب لكل واحد منهم.
6ـ جمع المجادي والمشعوذين والمتشردين بالشوارع اللي جايين للعراق من الخارج ونفاهم خارج الحدود.
7ـ أسس كلية الحقوق ببغداد ومعهد للمعلمين.
8ـ نظم عملية جمع الأوساخ والأزبال من أزقة بغداد الضيقة، وبدل ما كان يدخل الحمار يجمعون عليه الأزبال صارت الأزبال لها عربانة خشب خاصة وعامل يدخل الزقاق الصبح بساعة محددة وبيده جرس يرن بالجرس رنات محددة يطلع بعدها الناس من البيوت يرمون الأوساخ بالعربانة الخشب.
9ـ نظم عملية تنظيف مجاري البيوت وبدل ما كانت تحمل بظروف من جلود الحيوانات صارت تنقل بتنكات إلى الأماكن المعدة لها.
10ـ قضى على الكلاب السائبة ببغداد.
11ـ ساوى بين الغني والفقير والقوي والضعيف وامن الطرق وأشغل الجنود بالقضايا العسكرية.
12ـ أعد مشاريع إسالة الماء والكهرباء وتنوير الشوارع ومشروع الترام وجسر دائم على نهر دجلة، لكنها لم تنفذ بعهده وتنفذت بعده بسنين.