د. فراس محمد
دارت الدنيا بعبد الله الخياط – الظريف البغدادي – ولبس ملابس قاضي بغداد… جبة بيضا وعمامة بيضا وسبحة أم الألف، وصادف أن مرت به امرأة بشعة المنظر، وتصورت أنه قاضي بغداد، فگالت له:
حضرة القاضي…. عندي شكية على زوجي
أبو نجم ما كذب خبر تقمص الدور مثل عادته…
خير إن شاء الله … تفضلي
ـ گالت له: زوجي هاجرني وصار لي مدة أراجع حتى ينطيني نفقة وهو ما گاعد ينطيني
ـ گال لها: وتالي؟
ـ وتالي جيت اشتكي عندك بلكت تحصل لي منه نفقة.
ـ أبو نجم گال لها: بس… ما دام هو معاند وما يقبل ينطيچ نفقة.. انتي لازم تنطيه نفقة، بالشهر قران!
ـ المرأة گالت: بـــه يمـــه! هذا شلون حكم، صخام الصخمني!
ـ گال: معلوم.. ليش هو ما ينراد له فلوس نومي بصرة وشكر من يشوف وجهچ وتلعب نفسه!
إذا أبو نجم حكم للرجال بنفقة قران، بس لأنه مگابل مرته القبيحة، برايكم إذا أبو نجم عايش ونروح نشكي يمه على اللي يسمون نفسهم سياسيين بالعراق شگد يحكم لنا نفقة لإن احنا مگابليهم؟!
د. فراس محمد