د. فراس محمد
الله يرحمه عبد الله الخياط – الظريف البغدادي المعروف – راح على جيرانه صاحب الدكان وگال له: يابــه.. احنا كل شويه دازين الجهال، تمن، ملح، دهن، حطب، فلفل…الخ، ودزاين فلوس بيدهم… هاي سالفة طويلة، انت أحسن شي افتح لي صفحة بالدفتر عندك، وانطيهم أي شي يريدون وآني آخر الشهر أتحاسب وياك.
صاحب الدكان: غالي والطلب رخيص.
خلص الشهر وراح عبد الله الخياط للدكان يسدد حسابه، السلام.. عليكم السلام
يابــه.. ما تطلع دفترك دنشوف الحساب؟
صاحب الدكان: تامر، عندك الدهــن….
عبد الله الخياط: هسه خلي الدهن للتالي، أول نوبة دنشوف الطگطوگيات.
صاحب الدكان: عندك عشر باگات حطب.
الخياط: لا…. لا أظنهم هدعش باگة!
صاحب الدكان: شلون يصير! مقيدة عندي بالدفتر.
الخياط: آني بالي أحسن من دفترك… ليش آني آكل حقك.
صاحب الدكان: زين.. عندك نص حگة (2.083 كغم) ملح.
الخياط: لا.. أظنها حگة (4.16 كغم) وانت متوهم.. آني رجال حقاني.
صاحب الدكان: زين يابـه… حگة.. وعندك ثلاث أرباع (781 غم) فلفل.
الخياط: هــاي شنو! يمكن انت جايز من فلوسك.. عمي آني اتذكرها أوقية (1.041كغم) فلفل كاملة، تريدنا ناكل حرام!
صاحب الدكان: زين وعندك حگتين (8.32 كغم) بصل.
الخياط: واي … واي.. هذا خوش حساب.. البصل حگتين ونص.
صاحب الدكان: والله يابو نجم انت رجال حقاني.
الخياط: هاي شنو منك! اليوم دنيا.. باچر ورانا آخرة.
صاحب الدكان: مولانا.. وعندك ربع (260 غم) چاي.
الخياط: شنو ربع؟! احنا السماور مالتنا ما تطفي ناره.. أظنها نص أوگية (520 غم) چاي.
صاحب الدكان: يمكن آني متوهم!
الخياط: معلوم.. طبعا متوهم… انت رجال جايز من مالك!
صاحب الدكان: والله يابــه انت رجال حقاني.
الخياط: هاي شنو.. باچر شبر وأربع أصابع!
صاحب الدكان: مولانا.. وعندك مَنّين (50 كغم) تمن.
الخياط: لا .. شوف هسه انت اتوهمت.. أظن التمن من واحد (25 كغم).
صاحب الدكان: شلون يصير.. مو مقيدة بالدفتر؟!
الخياط: لعد كل هالحساب اللي فات ما كان مقيد بالدفتر؟ يعني قابل آكل حقك؟!
صاحب الدكان: يمكن صحيح! وعندك حگتين (8.32 كغم) دهن.
الخياط: أهووووو.. هذا غير دفتر مخربط! مولانا الدهن خمس أرباع بس.
صاحب الدكان: أبو نجم.. الله يخليك.. شلون خمس أرباع؟!
الخياط: بالله آني صححت لك كل هالحساب اللي فات وما گاعد تصدگ بيه؟!
صاحب الدكان: أبو نجم.. أخاف متوهم؟! الحگتين شلون تصير خمس أرباع؟
الخياط: يابــه.. قابل آني ما أعرف أكل بيتي ومقداره؟ عندنا كلهم ما يحبون الأكل الدهين… ثم آني دايما أشتري اللحم السمين.. ما نحتاج للدهن.
صاحب الدكان: زين يابه.. تعال نصفي الحساب وأمري لله.
الخياط: تفضل أغاتي.
وبهذي الطريقة دفع عبد الله الخياط حساب زيادة على الطگطوگيات مبلغ ما يتعدى الفلسان، وگطع من صاحب الدكان أكثر من دينار قيمة الدهن والتمن اللي بلعه ببطنه!
الله يرحمه عبد الله الخياط حقاني.. ما ياكل حرام.. ما أدري ذكرني بمن هالأيام.. هم مثله حقانيين وما ياكلون حرام!
د. فراس محمد