قصتين طريفة بالمعنى نفسه

قضاء داقوق قبل 100 سنة كان ناحية اسمها طاووق تابعة إلى لواء كركوك.
تدرون فيصل الأول طلب من العراقيين البيعة حتى ما يكرر مأساته بسوريا، وطبعا صعب يجمع الناس بمكان واحد حتى يبايعوه ولذلك صار ما يعرف بالمضابط، وتكلمت عن هذه المسألة قبل فترة.
المهم مدير ناحية داقوق أو طاووق وصله الأمر بتنظيم مضبطة البيعة لفيصل الأول وبعد شويه وصله خبر أن الانكليز غيروا رايهم وما يريدون فيصل، فاحتار مدير الناحية يسوي مضبطة لو ما يسوي، ويومها وسائل الاتصال غير ميسورة ما عنده برقيات ولا تليفونات حتى يتأكد.
بس ولا يهمكم مدير الناحية طلع فلتة وكتب مضبطتين
أول وحدة كتب بيها نبايع فيصل ملكا على العراق
والثانية كتب بيها نرفض فيصل ولا نقبل به ملكا على العراق
وأخذ المضبطتين وراح لوجهاء الناحية ووقعوا عليهن اثنينهن، بعدين أخذهم وراح لمستشار متصرف لواء كركوك الكابتن ملر
المستشار سأله وين المضبطة؟
فقال له أي وحدة تريد؟
وعرض عليه المضبطتين المستشار الانكليزي أخذها اثنينها.
طبعا في وقتها هذي عادية لإن الوجهاء تعودوا يسوون أي شي يطلبه الحاكم