د. فراس محمد
البغداديين عندهم مثل يگول ((كله كتبناه بالورق إلا الزلگ)) وحقيقة هذا المثل له قصة، صاحبها الملا محمد.. وهذا كان رجال أعزب عابد زاهد إلى حد التطرف، وسواسي وشكاك بمسائل النسوان، لدرجة أنه ماسك ورقة وقلم ويتابع أخبار النسوان اللي ينحرفون ويسقطون ويسجل أسباب سقوط كل وحدة وشلون انحرفت وشنو الحجج اللي تگولها لأهلها أو زوجها لما تطلع من البيت.. لما راد يتزوج طلب من أمه تخطب له امرأة صالحة طاهرة شريفة، وأمه حصلت وحدة معروفة هي وأهلها بالطيب والعفة، تزوج الملا محمد ومرت أول أيام زواجه وهو مرتاح من زوجته، إلى أن بيوم گالت له أريد أروح لبيت أهلي أسلم عليهم، شتگول؟ گال لها أوگفي لحظة أروح أشوف الدفتر، فتح دفتره وگلب بصفحاته شاف معلومة عن وحدة كانت تگول لزوجها آني رايحة لبيت أهلي وهي طلعت تروح لعشيقها.. فگال لها ماكو هيچ حچي، آني أروح أجيب اهلچ لبيتنا، مر كم يوم، گالت له يا رجال أريد أروح للخياطة، گال لها أوگفي أروح أشوف الدفتر، راح وگلّب بدفترها شاف نص صفحات الدفتر قصص النسوان والخياطة، گال لها واي واي.. الخياطة هي تجي للبيت، وفعلا جاب الخياطة، كم يوم وگالت له: يا رجال أريد أروح للماي الحار (حمام السوگ)، فتح الدفتر وشاف له مصيبة صايرة بحجة الحمام.. فگال لها أروح وياچ لحمام النسوان وأبقى انتظر بالباب إلى أن تطلعين.
حاولت تقنعه أن العفاف مصون لطاهرات الذيل، وسوالف الدفتر هذي ما تفيدك وبنت الأشراف شريفة لو تنام بالمعكسر، لكن الملا محمد مصر على مراجعة الدفتر بكل الأحوال، فكرت المرأة أن هذا لازم يتعلم ولازم تخليه يشوف شي ما مكتوب بالدفتر حتى يعقل.. إلى أن بيوم من الأيام طالعة هي وياه بالطريق يمشون وإذا الطريق مرشوش بالماي فزلگت وتعمدت توگع وتلطخت عباتها بالطين، فصاحت يبووو.. هسه آني شراح أسوي؟ يمعود خلي أدخل لهذا البيت أغسل الطين من عباتي يمهم، رضى الملا محمد ودخلت بأقرب بيت وبقى ينتظرها إلى أن نظفت عباتها وطلعت وگالت له: ها.. هاي هم مكتوبة عندك بالدفتر؟! أنت تدري آني سويت هذي الحيلة حتى أدخل لهذا البيت لإن هذا بيت صاحبي.. فصاح الملا.. الله أكبر.. كله كتبناه بالورق إلا الزلگ… لكن المرأة عاقلة گالت له هذي مجرد حيلة وأريدك تعرف إذا المرأة أساسها رمل ما يفيد بيها الدفاتر.
عيني نظامنا العراقي “الرشيد كلش” بكل أحزابه وشخوصه من 2003 إلى يومنا هذا.. أحب أگول لكم إن دفتر الملا محمد موجود عند العراقيين وبنسخة محدثة لإن الملا ضاف عليه سالفة الزلگ، واحنا ضفنا عليه كل البلاوي اللي صارت بعده، ومع ذلك انتوا كل يوم تفاجؤونا بسالفة ما مكتوبة بالورق، بصراحة أنتوا مدرسة وأصحاب منهج جديد..
وأخيرا أحب أنوه لشغلة مهمة.. مو سمعتوا قصة الملا محمد وزوجته الطاهرة الشريفة تاخذوها على نفسكم وعبالكم انتوا مثلها “طاهرة وشريفة” لا يابه لا.. تره كلنا نعرف والعالم يعرف شلون صارت قصة زواجكم بالشعب العراقي.. وإذا ما تتذكرون نذكركم… احنا أخذناكم فصل بعركتنا ويه بوش سنة 2003، بعد ما كفخنا جا الرجال يفصل وگال آني حاضر انتوا عندكم أعراف وعادات بالعراق إذا تعاركوا جهتين يتصالحون ويصير تعويض وينطون فصل ومرات الفصل من ضمنه امرأة أو أكثر وآني لازم أمشي على عاداتكم وأدفع هذا الفصل.. گلنا له يمعود اچفينا شرك وروح ما نريد منك شي.. حلف بستر خواته وبروح بنجامين فرانكلين اللي صورته على المية دولار الا يدفع الفصل.. گلنا لا يمعود عادي أبوك الله لا يوفقه هم كفخنا بسنة 1991 وما دفع فصل.. گال لا آني أختلف.. وگبعكم ودزكم علينا وبعد معروف ذوقه والنوعية اللي يدزها.