من سوالف المرشحين لمجلس النواب

بدايات العهد الوطني بالعراق ترشح عدد من الأشخاص غير الأكفاء لمجلس النواب والمشكلة أن هذي السالفة استمرت فترة طويلة، ناس أنصاف أميين صدگوا نفسهم (مثل هالايام ماكو فرق) بس الحلو بالموضوع الناخبين مال گبل أحسن من الناخبين مال هالايام، تدرون ليش؟!
لأن الناخبين أيام زمان فضحوا المرشحين من هالنوع فضيحة يعني ماكو واحد يگول والله هذا ما يفتهم بس ميخالف لأن هو من ربعنا وجماعتنا لو طالعلهم بالسحبة مال الحزب الفلاني، بالعكس چانوا يصنفون عليهم ويدزون تعليقاتهم للجرايد مو بس هذا وإنما شيگول المرشح للناس يدزون كلامه للجرايد وللمثقفين ويحاولون ينبهون أهل الحل والعقد حتى ما يدخل المجلس، ومن هذي السوالف أكو واحد من أهل الكوت دز برقية لجريدة الزمان البغدادية نشرتها بتاريخ 29/1/1947 تگول البرقية:
اليوم بالكوت السيد ياسر رشح نفسه للمجلس ووجه نداء لأهل الكوت ونشر لهم منهاجه اللي يريد يحققه بالمجلس واللي كان مختصر بهذي النقاط:
1ـ تبليط طريق بغداد الكوت بالكاشي والمرمر ورشه بماي المسك والعنبر وزرعه بالورد الأحمر المعطر.
2ـ تشجيع المنتوجات الوطنية بركوب الخيل والدواب ومنع استيراد السيارات الأجنبية.
3ـ تبريد ماي النهر بالصيف وتسخينه بالشتا.
4ـ السعي لمنع تجارب القنبلة الذرية بالبحار حرصا على سلامة وصحة الأسماك والحيتان واحتراما لشعور أسماك سدة الكوت.
5ـ السعي لتحديد ساعات عمل للحيوانات الحكومية والأهلية وجعلها ثمان ساعات باليوم.
6ـ السعي لتحريم ضرب خيل العربات والتفاهم معها بالحسنى.
انتهت البرقية المرسل “غراب”