لنا الآخرة

ـ واحد گال: عيني.. يابة.. أسرار هذي الاختراعات موجودة بالقرآن والكتب الإسلامية القديمة بس احنا المسلمين غفلنا عنها وما درنالها بال بينما الأوروبيين اهتموا بيها ودرسوها حتى فهموها واستخرجوا منها النتائج العلمية.

ـ گام واحد ثاني وگال: لا أغاتي .. الأوروبيين أهل دنيا وأبليس لازم يعينهم على دنياهم وهو اللي علمهم سر هذي المخترعات، أما احنا المسلمين إلنا الآخرة.

ـ طلع واحد ثالث وگال: الأوروبيين أولاد حرام لإن نسوانهم يخالطون الرجال ويرگصون وياهم ويسوون اللي يعجبهم بكيفهم بدون حدود وانتم تدرون ابن الحرام شيطان وذكي وكلشي يعرف.

المهم انتهى النقاش وما وصلوا لنتيجة

هسه خلونا بسالفتنا الله يرحم اللي راحوا هذي سوالف گبل 100 سنة ما تفيد خلونا بأيامنا هذي لإن احنا هم متعجبين بالحرامية والقتلة والمجرمين اللي صارلهم 15 سنة نفضوا البلد نفض، قتل.. تهجير .. نزوح .. محاصصة .. حرب طائفية .. تهميش.. إقصاء.. فقر.. جوع .. بطالة .. الشمعة.. الأيادي اللطيفة .. التوافق .. العراقية .. المجلس الأعلى للثورة الإسلامية.. المجلس الإسلامي الأعلى.. الحكمة .. ميليشيات .. قاعدة .. داعش .. بدر .. حزب الدعوة .. وكل هذي الهوسة وأضعافها.. نفس الوجوه ونفس العصابات ونفس الحرامية كلنا نعرفهم ومع ذلك يرجعون ويحكمون
بالبداية غصبا علينا لإن الأمريكان جابوهم وفرضوهم علينا وبعدين كل أربع سنين بالانتخابات يرجعون نفسهم ويحصلون ناخبين وأصوات… انتخابات 2006 و 2010 و 2014 وهسه 2018 ويمكن هم راح يبقون نفسهم.

والعجيبة كل الناس يشتموهم ويعرفوهم أنهم دمروا البلد وان العراق بوجودهم من سيء لأسوأ وبعدين يروحون ينتخبوهم .. الله عليكم هذي مو وحدة من العجايب المذهلة؟! مو كلنا متعجبين!

هسه خلي نتناقش ونفتهم شنو هالاختراعات العظيمة والعجايب اللي عند الجماعة اللي تخليهم باقين واحنا نعرفهم ونعرف وضعهم
يصير السر موجود بالقرآن والدين واحنا غافلين عنه وهم منتبهين ومستفيدين خصوصا أكثرهم أحزاب دينية وعمايم…..
لو هم أهل دنيا واحنا إلنا الآخرة ..
لو هم ولد حرام وتدرون ابن الحرام شيطان وذكي!!!!
أدري ما راح نوصل لنتيجة من النقاش بس خلي نشوفلها صرفة بلكي نفتهم السالفة